中環出更:霍啟剛樂聘工作假期年輕人

好多年輕人都曾經去過工作假期,早排卓妮見到香港中華出入口商會(中出)青委副主席霍啟剛,佢話當年畢業時未興工作假期,但就喺入大學之前留一年時間畀自己,唔使返學。霍啟剛對去過工作假期嘅年輕人持正面睇法,覺得佢哋積極外向,亦唔使擔心佢哋做做吓會辭職去工作假期添,因為已經去過喇嘛!

呢日係中出青委聯歡,中出副會長許華傑、秘書長陳勁、會董蔡曜陽、青委主席蔡德昇、副主席張仲夫、楊學霖及尹蕤菡都有出席。蔡德昇話好後悔當年自己冇去工作假期,形容係佢嘅遺憾。如果畀佢揀,佢會去英國,因為可以順便去埋歐洲其他地方喎!至於打咩工佢就覺得唔係最重要,重點係可以了解外國人嘅工作文化及相處之道,呢啲靠旅行係感受唔到。

蔡德昇搵好工靠自己

蔡德昇仲透露,畢業時自己好主動搵暑期工,話嗰時仲未興實習,但佢覺得好工係唔會出現招聘廣告度,所以就膽粗粗寫信自薦入大行工作,點知又真係得咗。

許華傑就話,除咗工作假期,去過內地實習一樣有優勢,仲話要幫內地實習團平反,事關依家一提到去內地就會被指係洗腦。佢話年輕人接觸資訊好廣,冇咁易被洗腦。反而現時市場渴求熟悉內地文化嘅人才,如果熟悉國內外文化,語文又好,一定特別有優勢。陳勁就話中出將舉辦「尋根追夢同心同行」真人騷活動,帶年輕人遊歷內地多個城市拍攝,希望以得意好玩嘅方式令港青了解內地。

卓妮

第一手消息請下載on.cc東網iPhone/iPad/Android/Windows Phone Apps