中環出更:法律超人阻郭卓堅濫用法援

外號「長洲覆核王」嘅長洲居民郭卓堅,日前被法律援助署以佢曾多次濫用法援服務為由,未來三年都唔會再受理佢嘅司法覆核法援申請。郭卓堅事後質疑政府打壓佢,有民間團體批評法援署做法唔恰當,但亦有唔少社會人士對今次決定額手稱慶。外號「法律超人」嘅建制派立法會議員謝偉俊(阿Paul)尋日喺電台自爆,佢好可能係郭卓堅被禁申請法援嘅「始作俑者」。

形容法援署做法徹底

阿Paul解釋,早前佢曾向法援署查詢署方對濫用法援服務有乜嘢準則,當中特別提及郭卓堅嘅例子,冇耐法援署就作出相關決定。佢批評社會上有人過分熱衷咁申請法援同提出司法覆核,強調《基本法》屬於憲制性條文,寫法比較籠統,如果有人一唔鍾意就申請法援提出司法覆核,就好多事情都要打官司。

對於三年禁制期係咪過長,阿Paul認為有討論空間,佢就會形容法援署今次做法做得較徹底嘞!

卓妮

第一手消息請下載on.cc東網iPhone/iPad/Android/Windows Phone Apps