中環出更：吳傑莊為降「三高」三個月激減廿磅
政商界中人不時都有應酬，唔經唔覺食得太多、太豐盛，對身體都未必係好事。香港青年聯會主席吳傑莊（Johnny）最近睇落清減咗好多，原來佢三個月內減咗廿幾磅！Johnny話，早排驗身結果有高血壓等「三高」問題，搞到佢要急急減肥。佢年紀唔大都有三高，原來都係應酬累事！
Johnny話自己一向都有好多應酬，尤其是返內地，飲食都比較勁。佢知道有三高之後，即刻急搵營養師幫手，跟住餐單少食多餐，成效唔錯，依家着衫都着細一個碼，笑稱減肥大計已經超額完成咗，以後飲食都會注意下。佢又話，好彩內地依家都開始注重健康，應酬時唔會再出現飲酒好似飲水咁嘅情況。身形愈嚟愈「大份」嘅考評局主席陳仲尼就話，自己成日話要減肥，但往往只係減得幾磅，好佩服Johnny嘅意志力喎！
王庭聰唔會買樓畀子女收租
轉頭見到香港工商總會主席王庭聰，最近有網友熱議依家父母會買多層樓畀子女收租，王庭聰曾經喺子女結婚時買樓送畀佢哋，但佢就話唔會買樓畀子女收租，如果佢哋想買樓當投資就要靠自己努力喇！佢又感嘆自己嘅能力仲可以幫子女置業，依家基層家庭嘅年輕人真係好難買樓，最緊要就係增加供應，建多啲公屋先幫到一班後生仔。
香港義工聯盟常務副主席馬浩文就話，部分郊野公園用地攞嚟建屋可能係一個有效嘅方法，但係郊野公園對佢好重要，事關佢經常去郊野公園，有時一星期去三、四次添！
卓妮