政情：湊仔兼做Gym激瘦 李梓敬畀老婆投訴
女性一向對身形同磅數特別敏感，更會害怕配偶太瘦，擔心相比下會令自己顯肥。一向骨感嘅深水埗區議員李梓敬（Dominic）話，太太已經開聲投訴佢太瘦，佢太太生完細仔近半年，近期先開始瘦身，唔知係咪呢個原因呢？
Dominic自從上年參加立法會選舉減磅後，就一路冇肥番，現時間中會去健身希望以最佳狀態示人。佢仲笑住話希望練出馬甲線喎！
工作忙碌難長肉
Dominic嘅瘦身攻略仲有湊仔，因為佢兩年抱兩，日日收工都要幫手湊仔，直言照顧小朋友嗰種辛苦難以形容，要生過先知喎！加上工作忙碌，難怪佢唔長肉喇！
近期有人關注外傭居住環境惡劣，Dominic話兩個囝囝暫時同房瞓，所以外傭有一間獨立睡房。佢話外傭瞓廁所屬少數個案，而瞓客廳「朝行晚拆」就較為普遍，但認為只要雙方簽合約時傾好就無問題。