中環出更:奇招留員工 老闆們有心得

企業派發花紅過後都會有唔少打工仔跳槽,近日更有調查指出,愈嚟愈多人寧願賺較低人工,都要追求生活同工作平衡,相信老闆都要為留住人才而費盡心思。尋日新界社團聯會舉行新一屆理事就職典禮,唔少政商界人士到場。講起呢個話題,開牙科診所嘅香港牙醫學會會長梁世民(Sigmund)就主張畀員工較高自由度喇!

Sigmund好明白打工仔心態,所以佢就少啲出現喺診所,又畀員工較長嘅午膳時間,方便佢哋處理私事。難怪佢聘用多年嘅員工,不約而同搬到診所附近,以便兼顧工作同家庭。

陳振彬銀彈政策護「資產」

然而並非所有牙醫都好似Sigmund咁識做,又咁好彩,佢聽過唔少同業呻話,有年輕員工離職時都唔出聲,突然人間蒸發咁,真係殺老闆們一個措手不及。

做製衣生意嘅觀塘區議會主席陳振彬就話,派發雙糧後係傳統離職高峰期,所以佢會用錢留人才,多年前已將雙糧平均喺每個月發放,員工扣除雙糧後嘅月薪亦比市價高,年尾仲有花紅添!佢話員工係重要資產,而且培訓涉及成本,所以佢會揼本減低員工跳槽動機。

同場仲有新社聯名譽會長董吳玲玲、會長梁志祥、理事長陳勇等。喺內地開印刷廠嘅董太就教路要加強員工凝聚力,所以每年都會舉行員工旅行,仲要適當地表揚同肯定員工表現,咁樣有助於增強士氣,令員工得到滿足感。咁有辦法,難怪佢講起員工離職潮都咁淡定喇!

卓妮

第一手消息請下載on.cc東網iPhone/iPad/Android/Windows Phone Apps