政情：徐立之兒時做實驗燒燶手
經常做實驗嘅香港大學前校長徐立之都有失手嘅時候。佢尋日出席「美荷樓香港精神學習計劃」講座，分享當年刻苦求學嘅故事。佢仲自爆一段「講出來會嚇死人」嘅經歷，話說佢細個曾經自作聰明將自製小摩打直接插入電掣取電，而唔係駁落電芯度，結果燒到隻手燶晒，仲話全靠保險絲救佢一命咋！
細個夢想讀設計建築
徐立之卸任港大校長之後，經常四圍同啲學生分享經驗。眾所周知，佢自細家貧，成績一般，但係得到貴人相助，順利取得中文大學生物學碩士學位，後來喺遺傳學上取得驕人成就。
佢坦言自己好好運，一路發展都頗順景。但其實佢細個嘅夢想係讀設計、建築，只係當年冇人問過佢想做乜。佢仲笑稱細個嗰時曾經參加一份本港報章嘅填色比賽，報紙仲刊登咗佢嘅作品添！
現任港科院創院院長嘅徐立之，致力推廣科學。被問及對創科局成立之後嘅成績同埋仲有乜嘢要做多啲？佢就避重就輕，話喺科研上中下游緊密結合方面要再做多啲，令更多研究成果商品化喎。