政情：郭基煇引用父「序」鼓勵學生
仲有唔夠兩個月就中學文憑試放榜，新地執行董事郭基煇（Adam）尋日喺一個活動中，用咗爸爸郭炳江五年前為一本書寫嘅序嚟鼓勵學生，話「人生中總會遇上逆境，可以叫人一蹶不振，但亦可以成為令人成長的契機」，勉勵同學即使成績唔理想，一樣可以有燦爛人生。佢又透露，之前去赤柱監獄探爸爸時，一樣用呢個序嚟鼓勵番爸爸，覺得特別感人咁話。
Adam話喺兩三年前睇到呢本由爸爸寫序嘅書，入面喺鼓勵學業失意嘅學生，「年輕人今天或許在學業上跌倒了，我深信只要家庭及社會堅持相信年輕人擁有潛能，並給予耐心、愛心、支持與機會，每一個折翼的孩子必能夠再次起飛」，覺得好感動，於是喺之前去赤柱監獄探爸爸嘅時候，都特別問番爸爸記唔記得曾經寫過呢篇序？
亦用作勉勵爸爸
佢仲話爸爸當初寫呢篇序係要嚟鼓勵學生，但依家就到佢拎番嚟鼓勵爸爸，覺得「施比受更為有福」。呢本書其實係五年前慶祝由佢哋新地贊助、突破合辦嘅「師徒創路學堂」計劃十周年而出版，今年活動已經踏入第十五年，至今已經有三百名學生受惠。