政情：陳恒鑌拒代筆 想囡囡撞板成長
早前有一個幼兒填色比賽結果公布，得獎作品竟然能夠恰當地運用顏色深淺、陰影效果，而且背景亦加入自創元素，如果唔係代筆，相信得獎者極具藝術細胞。立法會議員陳恒鑌（Ben）話從來唔會為囡囡代筆，甚至連對功課都唔會。
佢解釋並非自己疏懶，只係覺得囡囡要撞過板、試過拎低分，再經老師指正後先會有深刻記憶。不過佢太太就唔太認同呢種教育方式，所以要落力說服太太喎！
過去擔任過唔少評審工作，佢話過往評分時最注重創意，而佢亦深知幼兒繪畫程度去到邊，所以容易分辨係咪父母代筆，若果發現有代筆嘅情況，佢往往一律會因此扣分，直言參加者唔服可以上訴，憑即席表現說服佢咁話。不過，佢就話假如係親子比賽，佢就非常歡迎父母參與其中喇！