中環出更：高踭鞋刮腳鄺紫凌幾下搞掂
貪靚唔係女生嘅專利，但着高踭鞋就一定係喇！早前金紫荊女企業家協會舉行就職晚宴，唔少城中名媛叻女都腳踏一雙靚靚高踭鞋現身，卓妮見到新一屆主席丘璟珊（Carol）穿上斗零踭依然全晚從容不迫，佢直言腳傷都堅持着高踭鞋，仲有「鞋王」鄺海鑾千金鄺紫凌同鄺韻凌教大家高踭鞋刮腳嘅急救法。
金紫荊女企業家協會換屆，由Carol接替前主席彭芷君成為新當家，擔任主席一職。見Carol全晚着住高踭鞋滿場飛招呼賓客，原來佢話兩年幾前滑雪傷咗十字韌帶，但佢嫌做手術太麻煩，竟然一直忍痛忍咗兩年，中間仲繼續着高踭鞋同做運動，直到上年年尾佢打高爾夫球又再整傷，先做咗十字韌帶同半月板微創手術，原來一做完就可以行，之後又可以繼續着高踭鞋，不知幾開心。
蠟燭原子筆成急救神器
而鞋王千金鄺紫凌同鄺韻凌，亦當然好識揀靚鞋，之但係唔係個個都咁識揀（口架）嘛，萬一買咗刮腳又鍾意嘅鞋點算？鄺紫凌就教路可以用蠟燭喺刮腳嘅位置磨幾下，又或者搵支原子筆喺鞋嘅腳踭位置反覆碌幾下都得。鄺韻凌就話，除咗廠之外，佢哋近年做埋零售，同本地設計學生合作推出佢哋個人品牌嘅作品，有時亦會喺外國上架，令設計師可以踏足國際舞台。
同場仲有協會常務副主席林淑怡、成員沈貝嘉同蔡毅明，以及香港青年聯會司庫周沁。以前係模特兒嘅蔡毅明當年行騷經常着四、五吋高踭鞋，試過有次對鞋太細都要夾硬着，一行出場就拗柴，但都要頂硬上行完仲要再行，依家做咗設計師就相反嘞，可以着番平底鞋同波鞋，好在依家興啫！
卓妮