政情：余德寶積極修身10日減13磅
唔少人當選議員之後因為工作辛苦會變瘦，現年廿五歲嘅油尖旺區議員余德寶就啱啱相反，當選議員之後肥咗成個碼。為咗不負「小鮮肉」之名，余德寶近月就積極減肥，只係十日就由一百九十一磅，減至一百七十八磅，佢話距離目標仲有八磅，會繼續跑步減肥。
每日跑15分鐘 唔食晚餐
余德寶僅用十日就已經減咗十三磅，相信唔少人都想知道佢嘅減肥心得。佢話自己每日會跑步十五分鐘，而晚餐會食少啲或者唔食，只係十日就有呢個效果。咁啱余德寶屋企仲有部家用跑步機，方便佢足不出戶都可以實踐減肥大計。
至於佢嘅黨友冼豪輝就唔減都瘦，事關服務青衣嘅佢，早前去該區戲棚食嘢兼做餐具回收，估計因為咁而感染大腸桿菌，足足住院六日。佢笑言自己已經「無quota」再減肥，仲話有街坊送咗好多零食畀佢「補充體力」添！