政情：BCA公聽會 陳玉娥離題撐七警
基本能力評估研究計劃（BCA）、即改良版小三全港性系統評估（TSA）爭議不絕，唔少團體同個別人士尋日喺立法會教育事務委員會BCA公聽會發表意見。曾參選立法會新界東選舉、自稱為「網絡紅人」嘅陳玉娥（娥姐）亦到場撐BCA，但佢一開口發言即離題。
發言惹其他出席者不滿
離題？事關娥姐係話要求特赦七警，令到其他出席者聞言隨即表達不滿，要求佢「入正題」，委員會主席蔣麗芸亦提醒佢發言需盡量同BCA有關，雖則無助制止佢發言，但娥姐都開始轉入正題。
娥姐認為TSA有助訓練學生，反指有政客同團體利用學生自殺事件，作為取消TSA嘅藉口，誤導家長，誇大TSA對學生嘅影響。佢仲話：「自小訓練佢哋（學生）面對壓力係好事，唔做溫室小花，大個可以面對更大挫折」，又話TSA係一種訓練，若取消「人就唔完整」。