政情:行會成員林健鋒 唱反調拒撤對沖

勞工界力促現屆政府「找數」,於餘下不足兩個月任期內敲定取消強積金對沖終極方案,但勞資雙方於最新一次勞工顧問委員會會議,仍未能達成共識,言猶在耳,身兼行政會議成員嘅商界第一議員林健鋒(Jeffrey)代表商界出招,忽然靠嚇稱假如政府決定硬闖,聽聞有中小企寧願於新例實行前炒晒所有員工,改為聘請合約制員工。Jeffrey突然拋出靠嚇論認真大膽,莫非Jeffrey懶理自己係行會成員,以為可以唔使撐政府,甚至可以「唱反調」乜都講一餐,都可以「神不知,鬼不覺」?

改推銷商界主流新方案

政府事先張揚目標係六月底前敲定取消對沖方案,Jeffrey今次除咗公開靠嚇疑似「唱反調」,更拋出新時間表,稱對沖方案唔使急於兩、三個月內拍板。如果Jeffrey嘅如意算盤真係成真,取消對沖方案就好大機會由新任勞工及福利局局長負責,隨時因為要重新掌握目前對沖方案爭拗點,又要多啲時間先可以拍板,咁樣一來一回,真係唔知幾時先可以解決對沖方案爭議嘞。

講番內今次取消強積金對沖方案討價還價嘅焦點,其中一個係關乎政府建議嘅取消對沖方案,即於特定時期劃線,政府出資六十億元補貼僱主因取消對沖首十年嘅額外開支,同時將遣散費及長期服務金比例降至二分一,Jeffrey尋日接受電台訪問時首先預警,如果政府十年後抽身,會嚴重加重商界嘅經營負擔。

Jeffrey其後口鋒一轉推銷商界主流提出嘅新方案,稱於保留對沖前提下,商界同政府各增加百分之一強積金供款,另外建議政府幫僱員購買失業保險,佢希望政府平衡各方意見,並真正「落水」處理額外開支。

對於Jeffrey突然出招靠嚇及推銷商界新方案,前立法會議員鄧家彪(阿Bill)批評,Jeffrey嘅言論唔負責任,會影響到個談判氣氛,佢同時指出認同政府係需要再做多啲,唔應該將極端例子放大、甚至係靠嚇去談判。

阿Bill又提及,依家勞動市場相對唔錯,加上市道亦幾好,反問如果依家唔做,要等到幾時先落實取消對沖呢?佢重申,希望現屆政府可以落實取消對沖,會把握餘下嘅時間盡力去談判及解決問題。

第一手消息請下載on.cc東網iPhone/iPad/Android/Windows Phone Apps