中環出更:大埔落區 CY遭拍片狙擊

特首梁振英(CY)任期剩番唔夠兩個月,近日就趁周末落區,繼前日去咗九龍灣淘大花園做探訪後,尋日就去咗沙頭角同大埔等地。不過,正當CY去到大埔時,就遇上一名女子狙擊,該女子一邊拍片,一邊不停鬧佢,「官商鄉黑呀橫洲單嘢你搞掂未」、「解釋番UGL五千萬」同埋「你嗰五千萬幾時還呀?」仲要求CY「同全香港嘅人道歉」。

女子指罵 促向港人道歉

拍片狙擊嘅網民Rocena Lee Yan Yan,尋日將兩段合共約三分鐘嘅狙擊片放上社交網站facebook,根據片段所見,CY喺落區期間,拍攝者一路追住CY,仲一邊追,一邊有把女聲喺隔籬不停鬧CY,指罵內容包括「官商鄉黑呀橫洲單嘢你搞掂未」、「解釋番UGL五千萬」、「你嗰五千萬幾時還呀」同埋「你點樣對啲學生呀」等等,全部都係同近年CY備受爭議嘅事件有關,包括元朗橫洲風波、收受澳洲UGL五千萬事件等。

除咗狙擊CY,片段中仲聽到該女子要求CY「同全香港嘅人道歉」。不過,佢有佢鬧,CY全程冇回應,只係一路行一路笑笑口,仲同市民合照。

卓妮

第一手消息請下載on.cc東網iPhone/iPad/Android/Windows Phone Apps