中環出更：莊菲娜情迷法式浪漫
法國一向予人浪漫印象，早前法國五月藝術節喺香港文化博物館庭園舉行二十五周年銀禧晚宴，嘉賓可於晚宴前參觀埋「羅浮宮的創想」展覽，現場除咗有唔少來自羅浮宮的珍貴皇家收藏及大師級展品外，仲有一幅電子版蒙娜麗莎，吸引唔少名人出席。香港福建同鄉會永遠名譽會長莊哲猛女兒莊菲娜（Fiona）都有現身，除咗浪漫回憶外，佢仲諗起當年參觀法國羅浮宮一件搞笑事添。
Fiona話，呢幅蒙娜麗莎令佢諗起當年兩次去法國羅浮宮睇蒙娜麗莎真迹時，幅畫前面都係圍住一大堆人，完全無法接近，笑言傳聞中蒙娜麗莎對眼邊個角度睇都好似望住你，但佢就覺得想喺邊個角度睇蒙娜麗莎都係咁多人至真。法國對Fiona仲有另一番意義，事關佢每次有特別節日或者同丈夫楊華勇慶祝周年紀念都會揀食法國菜，所以話最浪漫嘅日子都喺法國餐廳度過。
李凱琪讚法國飲食藝術認真
同場嘅金紫荊女企業家協會副主席李凱琪就同好多法國人一樣，係一個「甜品控」，其中對法國最深刻嘅印象，就係法國人食完晚餐後，仲會有六至八道甜品，連嗜甜嘅佢都覺得好驚訝，而佢去年底仲喺法國參觀咗Coco Chanel的家，大讚法國人對飲食及藝術都非常認真。
香港島婦女聯會主席張雅麗都有出席，原來佢丈夫四年幾前就係諗住喺法國古堡向佢求婚，點知佢感冒加上太凍，丈夫就臨時改喺巴黎晚餐時求婚，大大紮花加埋濃厚嘅浪漫情懷，佢都忍唔住感動到喊。
卓妮