話說政府喺年初向城規會提出修訂啟德分區計劃大綱圖，當中包括增加十六幅土地嘅發展密度，以增加樓宇供應。即係起屏風樓喇，環保觸覺義務總幹事譚凱邦鬧爆政府無對症下藥，犧牲咗通風同景觀，更無助市民置業，仲揚言政府必須增加銷售限制，只限首次置業嘅港人購買自住，否則會反對增加發展密度添！喺幫市民上車同環保之間點取捨呢？真係唔知發展局局長馬紹祥點拆彈？
