中環出更：梁福元被拖租 靠冰佛止蝕
元朗大棠「冬季樂園」上個月突然停業，老闆至今不知所終，租地畀樂園嘅十八鄉鄉事委員會主席梁福元亦被拖欠兩個月租金。眼見租金好大機會見財化水，梁福元就將樂園嘅「剩餘物資」再用，特製咗一個冰佛擺喺冰雪館，配合回歸活動為名嘅佛誕活動，盡量減少損失咁話。
呢個冰雪館原本係「冬季樂園」嘅招牌設施，溫度長期設定喺零下十度，設有冰屋同冰滑梯等，但係樂園老細失蹤後，冰滑梯已被封，為咗盡用「剩餘物資」，梁福元就特製咗一個高四米嘅冰佛，趁佛誕搞搞噱頭，最緊要吸引人流止蝕！為咗吸客，佢更親身硬銷冰佛，指以前入冰雪館十分鐘就頂唔順，但係入去拜冰佛就半個鐘都冇問題，因為有「佛心」護體咁話。
冰佛只係噱頭，由多個團體合辦嘅佛誕節暨齋菜盆菜宴先係主角，尋日有四百五十圍逾四千人參與，場面相當墟冚。早前部分地區活動被踢爆同回歸無關，難怪尋日上台致詞嘅嘉賓都講多幾句回歸祖國嘅感想，好似立法會議員梁志祥就話一國兩制成功落實，但有人搞港獨同借民生議題生事，所以要靠佛教教義，推動包容和諧。
劉業強自認唔夠爸爸體力好
鄉議局主席劉業強亦指一國兩制係維持香港繁榮穩定嘅定海神針，又指佛家講求慈悲喜捨，即對眾生感同身受，仲話咁做可以達到政通人和添！講起久未露面嘅前主席劉皇發，劉業強指爸爸身體唔錯，但唔再周圍走啦，統統都由佢頂上，但係佢承認唔夠爸爸咁好體力，主要都係出席新界聚會，市區活動就可免則免。
嘉賓之一嘅民政事務局局長劉江華亦喺活動中寫咗張祈福卡，並寫上「清靜平和、如如喜祥」，被問到願望係咪同仕途有關時，佢只係輕輕點頭微笑拒絕回應。
卓妮