政情：甘文鋒睇波遇騷亂 除衫先落到車
足球場內外間唔中都會出現暴力事件，過去更有球迷騷亂事件而出現人命傷亡添。屯門區議員甘文鋒就話自己親身經歷過，但回想起嚟覺得既危險又低能喎。
甘文鋒讀完中五之後就去咗巴西交流一年，當時寄宿家庭為巴西勁旅彭美拉斯嘅球迷，所以佢就跟埋去睇作客賽事，而當時對手為鄰近地區球隊而充滿火藥味，佢哋架私家車一抵埗更即時惹起主場球迷包圍指罵，搞到要除波衫先落到車。
到公路始敢慶祝 笑言低能
火藥味到完場時更加誇張，因為甘文鋒一行人所支持嘅球隊贏波激到主場球迷發難，嚇到佢哋都唔敢慶祝，但一上到公路就如釋重負不停大叫，所以咪形容當時自己行為低能囉！
佢仲話估唔到第一次入場睇波就咁難忘，而佢亦學識要加入球迷會，因為人多夠氣勢唔會畀人蝦咁話。不過，佢都好開心有呢段經歷，仲話係參加交流團嘅目的添！