政情:肥老闆發炮燒埋小肥張

今年係香港回歸二十周年,唔少地區團體都向政府申請資助搞回歸活動,但立法會金融服務界議員張華峯(肥老闆)早前就喺立法會罕有開火,狠批部分地區主辦嘅活動掛上慶回歸嘅牌頭,實際同回歸完全無關,有「篤數」之嫌;佢尋日再踢爆原來有團體連除夕倒數都當回歸活動,搞到佢忍無可忍再發炮,叫政府要嚴肅整頓一下,睇嚟肥老闆點都唔會輕易放過政務司司長張建宗(小肥張)。

肥老闆上月喺立法會財務委員會特別會議上,踢爆部分聲稱回歸嘅活動,同回歸二十周年無甚關連,搞到小肥張同民政事務局局長劉江華事後要急急解畫,非常狼狽。肥老闆尋日被問到點解會發現呢啲「掛羊頭賣狗肉」嘅活動時,佢又再忍唔住爆料,指自己經常落區參與活動,但係近呢幾個月竟然見到一啲清潔比賽竟然掛上回歸活動嘅牌頭,搞到佢一頭霧水,佢話:「有啲連除夕倒數都當慶祝回歸,我一啲都feel唔到喎。」

自嘲無分量 無官員跟進

屬建制陣營嘅肥老闆罕有開火批評政府,正如佢話齋今次真係「忍無可忍」,不過佢形容自己講嘢無分量,事後唔見有政府官員打畀佢跟進,惟有拜託黨友兼行政會議成員林健鋒幫佢向政府反映意見,嚴肅整頓有關情況,唔好乜嘢活動都同回歸拉上關係咁話。

其實尋日係肥老闆牛一,縱橫股壇多年嘅佢,生日願望自然離唔開鍾情已久嘅港交所。港交所新一年工作計劃提出,喺目前市場上有嘅主板同創業板外,新增「第三板」,雖然有關建議連諮詢都未開始,但佢已經好心急咁希望「第三板」能夠盡快上市,帶旺股市業界。

想申長者卡去海洋公園

年滿六十五歲嘅肥老闆又話會申請長者卡,原因係佢好少搭私家車,例如平時過海都係搭港鐵代步多,所以非常需要長者兩蚊優惠,仲會考慮用長者優惠去海洋公園玩添!

眾所周知,肥老闆鍾意食東坡肉,而佢為咗健康近年開始嘗試戒口,但每次朋友請客食飯,往往餐牌未到,朋友已為佢點咗東坡肉,而佢又唔生性忍唔住口,所以戒口嘅進程唔多理想。

第一手消息請下載on.cc東網iPhone/iPad/Android/Windows Phone Apps