政情：即將就任教大校董會主席 馬時亨談「四大願景」
港鐵主席馬時亨（肥亨）早前獲政府委任為香港教育大學（教大）校董會主席，周二就上任喇。肥亨尋日出席電台節目時話，佢前幾日已經同教大老師及同學見面，仲大談對教大嘅「四大願景」，包括要憑佢嘅人脈努力幫教大籌錢集資。肥亨仲自爆接受任命係因為自己細個時曾經無心向學，全靠當時遇到個好老師，令佢發奮圖強。
希望多啲一帶一路學生入讀
肥亨話，佢細個時都曾經無心向學，仲經常喺條街度遊蕩，成績就梗係唔好啦。直到中四就讀新法書院嘅時候，就遇到一個教歷史嘅好老師，啟發佢決定要發奮讀書，下定決心日日去圖書館溫書，到最後更成功考入香港大學。
至於上任校董會主席後有乜大計，肥亨話佢有四大願景，包括培育多啲有心的老師；提升學生國際視野，讓學生多啲機會到外國交流，亦都希望多啲「一帶一路」學生到教大學習；提升教大學術地位；以及幫教大籌錢，因為教大籌錢能力唔係好高，而佢哋起宿舍、設施等都要錢，希望可以盡力做多啲咁話。