中環出更：政府放行 楊立門下月廠商會返工
有「AO歌王」之稱嘅民政事務局前常任秘書長楊立門（Raymond），早前獲中華廠商聯合會（廠商會）招手做行政總裁，但礙於佢仍然處於退休高官再就業嘅「冷河期」，需要向政府申請。據了解，Raymond已經獲得政府批准放行，下月八日正式返廠商會新工。
今年適逢香港回歸二十周年，作為本港四大商會之一嘅廠商會自然需負責唔少活動，但上任行政總裁、曾任康文署署長嘅梁世華在去年底病逝，遺缺懸空至今已差不多四個月，廠商會都急於搵人接任，最終睇中曾經出任多個政府部門嘅Raymond，雙方一拍即合。
據悉，仍處於「冷河期」嘅Raymond已獲政府批准擔任新職，並將於下月八日正式返工，而佢近日亦頻頻去廠商會，似乎為接手做好準備。Raymond接受本報查詢時指出，現階段仍未上任，稍後安頓好先再一併回應。
李秀恒對楊有信心
廠商會會長李秀恒就讚Raymond在社會各界擁有優厚人脈，又表示該會行政總裁一職由退休高官擔任屬傳統，覺得對方有心服務社會，該會正可以提供平台，有信心Raymond可以打好呢份新工。
卓妮