政情：控體重有法 張宇人照鯨吞火腿包
立法會飲食界議員張宇人（Tommy）早年減肥成功，前幾日佢行開中環去一個商場探朋友，見到夾有巴馬火腿嘅麵包，即時食指大動，幾啖就將個包鯨吞落肚。咁食法，唔怕肥番咩？Tommy就話，只要戒食煎炸嘢就足夠控制體重喎！
自爆極愛食雪糕
鍾意食嘢嘅Tommy話，減肥戒口要有策略，唔係乜都唔食就係最好。其實只要戒食煎炸食物，少油少糖，即使有時食多咗，都係重咗幾磅，仍然控制到體重。講講吓，佢又自爆有鋪雪糕癮，每次經過某連鎖快餐店都會買一杯軟雪糕食，仲話早年政府曾經提出收回市場雪糕車嘅牌照，佢就大力反對，因為雪糕車係香港特色咁話。
Tommy最近又迷上一間喺香港新開嘅意大利雪糕專門店，尤其係佢哋嘅水果味雪糕，原材料全部來自自家農場，果香味十足。照咁睇，Tommy想保持體重都好難。