政情：九西補選泛民鷸蚌爭建制漁人利

公文袋內未有共識派人

據了解，負責協調民主派選舉嘅民主動力初步就補選問咗各大政黨嘅意向，並試圖協調初選。消息話，白鴿黨初步屬意深水埗區議員袁海文，而公文袋就有意派出油尖旺區議員余德寶出戰補選。有民主派中人透露，袁海文近日專攻醫學美容議題，並多次藉事件曝光，同當年以圍標議題捧林卓廷參選嘅方式如出一轍，相信袁海文鐵定會代表白鴿黨出選。

至於公文袋黨內就有唔同聲音，有指部分領導層認為該黨喺九龍西零議席，點都要爭取一席。但亦有人擔心，一旦參與補選恐會被批評係作「政治收割」，而且至今仍有大量不確定性，包括應否支持游蕙禎參與補選，以及政府最終會取消多少議席，所以仍應靜觀其變。若果最終派人練兵，相信現年廿六歲嘅余德寶機會最大。

至於喺上年立法會選舉全軍覆沒嘅民協就出現世代之爭。政治老人馮檢基同埋新生代何啟明都有意參加補選，咁就要喺民主派進行初選之前，先行進行黨內初選，參考黨員投票意向同埋大學民調之後，再決定派邊個出選。

搞初選資金龐大難負擔

雖然話民主動力協調初選，以免令建制派漁人得利，不過有民主派人士直言，大家各懷鬼胎，對成功舉行初選唔係咁樂觀。事關搞初選要一大筆資金，以目前各政黨嘅財力，未必可以負擔得到；二來大部分政黨未必視勝出選舉為目標，若果只係想練兵，咁個個都想自己派人出選喇，以免借出去嘅票收唔番。

政壇傳聞指，補選將會喺明年三月舉行，究竟民主派會展示大團結，抑或係鷸蚌相爭、建制得利，仲要拭目以待。