政府對樓價升浪束手無策，一味加辣加辣再加辣，根本無助樓市降溫。香港樓價喪升，北角有新盤開價，望街市景一房都要千萬入場。有物質女表白「有樓有高潮」，仲要係二千平方呎添！看來一眾港男今生來世都好難做得成硬漢子，唔好話買個百多平方呎嘅蝸居都難，要二千平方呎才可令物質女「有高潮」，你話係唔係世紀最大難題？
講起買樓，唔傷感係呃人；香港已連續七年成為全球最難負擔樓價嘅城市，要大約十八年不吃不喝才可置業。唉！你話活在呢個城市，「年輕人想扑嘢都搵唔到地方」，年輕人又點會活得幸福？昔日辱華女嘅「扑嘢論」果然一語成讖！嚟緊嘅新特首林鄭話會讓更多港人置業安居，表示會透過填海等途徑解決有關房屋及土地短缺問題；老朽都覺得若佢係女媧，首務之急非「補天」而係「補地」；屆時連老朽都可以「上樓」，領略平生可令老伴亦有高潮，則死亦無憾矣！
其實，唔單止香港樓價喪升，內地不少城市嘅房價亦升到老百姓牙痛咁聲。據說二○一六年最佳微小說亦與買樓有關：「等房價跌了，我就買房和你結婚。」他暖暖地說。聽完後，她的心裏涼涼的。她想，這大概是最婉轉的分手了。已故「香港股神」曹仁超曾多次寄語年輕人，不要讓五百呎綁住青春。唉，要是佢老人家仍在世，恐怕會驚訝於世事的多變幻，如今嘅百多呎「蟻穴」，年輕人想畀佢綁住青春亦無能為力！唔好話千萬元，即使五百萬元，以佢哋大學畢業後，非專業者一般一萬元左右嘅入職月薪，根本冇可能會儲到首期；香港年輕人根本看不到前途，你話香港未來一片光明，試問憑乜嘢叫佢哋相信呢？內地長沙有個售樓廣告蠻吸睛：你與岳母的距離，只差一套房，沒有房你只能叫阿姨！可以預期，不單是內地，香港也是。「阿姨」會是人口增長最快的一群新人種！