政情：官員也指違程序 蔣麗芸發文死撐
立法會教育事務委員會主席蔣麗芸（Ann）日前主持會議時又惹爭議，皆因佢批准咗廿幾名曾經參與小三全港性系統評估（TSA）試行計劃嘅學校代表出席會議，但係又無事前問委員，涉違反議事規則。有知情人士透露，政府高官都認為阿Ann當日做法違反程序，明言唔可以再發生；更有人質疑阿Ann同人稱「吳得掂」嘅教育局局長吳克儉扯貓尾，做之前無通知其他人。
反質疑民主派滅聲
事件發酵多日，阿Ann尋日再次喺facebook死撐，否認自己係「濫權」同違反議事規則，仲話由通知開會，至到上星期五提出邀請團體出席，都未收到任何議員反對，直至星期一會議，教育界議員葉建源先話唔畀團體出席。佢仲質疑，民主派議員拒絕學界發言係滅聲。
不過，有知情人士透露，阿Ann決定畀支持團體出席前未同建制派議員商討，當日亦有建制派議員勸喻佢收手。知情人士更指有局長級別嘅政府高官都認為阿Ann當日做法違反程序，明言唔可以再發生。最終教育事務委員會都係決定，五月八日搞公聽會正式聽唔同團體意見。其實一開始正正經經搞公聽會咪得囉，搞場大龍鳳之後就要跪低，真係無嘢搵嘢嚟搞囉！