政情：盧偉國常往打波 好熟大灣區
國家提出研究制訂粵港澳大灣區城市群的規劃，特首梁振英喺下周會率領團前往粵港澳大灣區城市群考察。立法會工程界議員盧偉國自爆對大灣區非常熟悉，自己經常到廣州、東莞等大灣區城市，仲由平時喺香港打golf（高爾夫球）肚餓時會食蕉，依家返到內地打golf就會入鄉隨俗，食八寶粥充飢，講到內地造罐嘅技術係由香港帶入嘅。嘩！真係唔講唔知喎。
大談造罐技術
盧偉國話其實打golf食八寶粥好方便，因為係一罐罐，拉開個蓋就食得。佢又透露自己同罐嘅淵源，原來佢早喺八十年代已經喺內地蛇口、廣州、東莞、中山啲廠做嘢，一開頭就係造罐，汽水、噴髮劑等各類產品嘅罐都有製造，而一個罐由外在包裝、罐內塗層都有專門嘅公司去製造，而喺八十年代，內地冇造罐嘅技術，要由香港引入。
佢又話罐上面嘅拉環如果造得唔好，壓印位造得唔好，罐內物質就容易漏出嚟，如果係汽水，可能未過期就冇晒氣，而依家易拉罐嘅拉環通常已經設計到唔會拉斷，咁樣就可以防止被拉環整傷。