政情：高官輪住清假楊偉雄符碌做財爺

紅日港股休市 料平靜度過

今日係復活節假期首日，政府提早一日刊登憲報，宣布波叔由前晚開始休假，直至下周一復任司長，期間由楊偉雄署理財爺職務，換言之，楊偉雄可以過四日財爺癮，基於一連多日都係紅日假期，港股休市，預料楊偉雄可以平靜度過呢四日。

按照過往慣例，如波叔外訪或休假，署任財爺次序依次係財經事務及庫務局局長陳家強、商務及經濟發展局局長蘇錦樑，基於後兩者喺尋日正在休假或外訪，加上據知陳家強、蘇錦樑其後一連多日復活節假期亦會休假，因此帶挈上任局長只有約一年半嘅楊偉雄，首嘗署任財爺癮。

事實上，復活節假期前後向來係高官清假嘅黃金檔期之一，食物及衞生局局長高永文喺啱啱過去嘅周日率先休假三日，而民政事務局局長劉江華喺尋日開始休假，橫跨復活節四日紅日假期，直至下周六復任局長，前後放假合共九日，期間由民政事務局副局長許曉暉署任局長。

另一方面，因應港府高層喺下周三（十九日）至下周五（二十一日）到粵港澳大灣區城市群訪問，短短三日要訪問六個城市，據悉港府六名司局長都會隨行，包括波叔、政務司司長張建宗、政制及內地事務局局長譚志源等，政府尋日亦有公布呢段時間嘅高官署任安排。

高永文升呢 署任政務司長

首先張建宗離港期間，由高永文署理政務司司長職務，據知今次係高永文出任局長超過四年零九個月時間，首次署任司長，如高永文一如政圈盛傳喺七一離開政府，即將署任司長嗰三日，相信就係佢官場生涯嘅最高峰；波叔喺呢段時間亦會離港外訪，由於陳家強已回港坐鎮，因此順理成章由佢署理財爺職務。