中環出更：張心瑜禪修之旅體驗天堂地獄
仁愛堂前主席張心瑜（Fiona）早前同廿幾位好友，結伴到喜瑪拉雅山腳下嘅神秘國度不丹同尼泊爾旅行。不丹係佛教國家，幸福指數喺全球數一數二，Fiona都話感覺好似上咗天堂，但當佢哋轉往尼泊爾後，即刻覺得好似跌咗落地獄，事關當地幾年前爆發強烈地震後復建緩慢，倒塌嘅房屋仍四處可見，破敗景象令人感到黯然。
呢次成個行程長達八日，Fiona話一班團友多數篤信佛教，所以去不丹主要目的係禪修。不丹多廟宇，眾人周圍去參觀，大開眼界。講到最難忘嘅經歷，要數登上海拔三千多公尺嘅著名景點虎穴寺喇！不過唔係因為終於有幸嚟到佛教徒必到嘅朝聖聖地，亦唔係被懸崖峭壁嘅靚絕美景感動，而係一位雙目失明嘅女團友克服萬難登上高峰嘅精神，令佢畢生難忘。
從不丹走到尼泊爾
Fiona話呢位團友係內地人，因為家族遺傳後天雙目失明。登上虎穴寺需時三小時，落山又要三小時，加上條路好斜唔易行，所以好多團友都想半途放棄。但係呢位失明團友堅持行上去，令眾人好鼓舞，心諗連盲人都做到，仲有乜嘢困難克服唔到呢？最終所有團友都登上虎穴寺。Fiona直言好感動，係今次旅程嘅意外收穫。
帶着好完美、好幸福嘅感覺前往下一站尼泊爾，點知感覺好似由天堂跌落地獄。Fiona形容當地滿目瘡痍、好污糟，若唔戴口罩就呼吸唔到。佢仲笑稱，去到尼泊爾就覺得北京嘅霧霾唔算係乜嘢喎。
卓妮