政情：王國強理大做講師 從商經驗當教材
廣東社團總會榮譽主席王國強（KK）舊年底修畢理工大學商業管理博士學位，不但彌補當年被理大踢出校嘅遺憾，稍後新學年佢更會喺理大擔任講師，仲笑言自己多年來喺商界嘅經驗，就係最好嘅教材嘞！
考慮邀商界好友課堂分享
身為金城營造集團主席嘅KK，多年來為公司出謀獻策，將公司規模由十幾人發展至今日超過二千人，係商界嘅成功故事之一。佢透露下學年將由學生變身講師，喺理大嘅工商管理等課程授課，而佢打算與學生分享多年來嘅行商經驗，所以唔使備課。佢又話會考慮叫其他商界好友去佢教嘅課堂上做分享，相信同學可以大開眼界喎。
KK對理大有好大嘅情意結，話說佢喺一九六八年考入理大前身工業專門學院（工專），但因為熱力學呢一科成績只得五十九點四分，差零點六分先至合格，結果被退學。KK諗起都好心噏，不過當時全班三十六個同學之中，廿六個都同佢一樣命運。佢之後輾轉到外國升學，但為咗彌補當年被踢理大嘅遺憾，佢毅然再重返校園做超齡學生，仲成為理大近二十年來年紀最大同以最短時間攞到學位嘅博士添！