政情:葉國謙勢被扯出行會

新一屆政府就快上任,政界除咗(目及)實司局長名單幾時會出爐之外,各黨派對行政會議非官守成員嘅名單亦虎視眈眈。參考過往慣例,民建聯(民記)佔行會一席,但黨內現時對於邊個做行會成員有所爭拗,甚至出現內亂,唔少黨友質疑「老鬼」葉國謙戀棧權力兼脫節,圖將賴死唔走嘅佢扯出行會,換番個做緊立法會議員嘅自己友上去,務求要理順番行政、立法關係,唔要「老人黨」垂簾聽政。

黨內想推張國鈞做接班人

正所謂一朝天子一朝臣,政界期望七一新政府上任會見到更多新面孔,行政、立法關係會有所改善。盛傳民記高層早前亦向新政府提交咗一份黨內名單,推薦合適人選加入問責班子。此外,據了解有唔少民記黨友向黨高層提出多一個要求,就係想將做緊行會成員嘅葉國謙扯出嚟,唔想佢繼續喺度垂簾聽政。

有黨友坦言,民記加入行會嘅目的係想理順行政、立法關係,葉國謙今屆退下火線之後已經冇再接觸立法會工作,跟唔上議會步伐,繼續由佢擔任行會成員根本就於理不合,更有人抱怨葉國謙賴死唔走、戀棧權力,係都要霸番一官半職。據聞黨內亦有聲音希望由出任過林鄭競選辦人員嘅張國鈞補上,但有民記中人分析,張國鈞可以補上嘅先決條件係要葉國謙自己肯讓番個位出嚟,仲要得到黨主席首肯先有機會成事,絕對唔係佢想補上就可以做。

其實無論黨內外都有不滿葉國謙嘅聲音,例如舊年立法會換屆之後,葉國謙已經陰魂不散,喺建制派嘅WhatsApp群組賴死唔走,仲不時發表意見,成日指指點點教班議員要點樣發言,搞到包括民記黨友在內嘅議員都埋怨佢垂簾聽政,甚至畀人質疑佢戀棧權力,想繼續喺幕後指揮。

至於黨內,自葉國謙宣布唔選立法會開始,佢已經積極為其親信陳學鋒鋪路接棒,但民記內部有強烈嘅反對聲音,最終令陳學鋒初選失敗,而初選嘅結果亦反映黨內不滿葉國謙嘅情緒高漲。

第一手消息請下載on.cc東網iPhone/iPad/Android/Windows Phone Apps