政情：再培訓學剪髮 梁永祥想幫人「義剪」
僱員再培訓局主席梁永祥都要再培訓？梁永祥尋日趁再培訓局同傳媒年度聚會時，即席幫一位婆婆剪頭髮，莫非佢接受再培訓轉型做咗髮型師？原來佢上個月報讀再培訓特別班學剪髮，上咗四堂合共六小時，喺屋企都要練習剪髮手勢，希望將來可以幫有需要人士「義剪」。見佢剪得有板有眼，佢就畀自己七十分，仲講笑話如果可以幫自己同老婆剪髮，年中可以慳番唔少錢。
獲續任主席兩年
梁永祥透露，剛獲續任再培訓局主席兩年，會繼續為大家服務。佢回顧過去一年工作，話二○一六年度有約十二萬三千人次入讀僱員再培訓局嘅課程，創再培訓局成立以嚟新高，亦較對上一年上升百分之三點五。
被問及有人話多人要再培訓，係因為經濟差、多咗人失業，梁永祥就話兩者係有啲關係，但愈嚟愈多人係想自我增值，先嚟修讀課程提升競爭力。
局方今年亦新推「全民愛增值」活動，十五歲或以上、具副學位或以下教育程度市民，可免費報讀一項半日或晚間制非就業掛鈎課程，本年度已預留一萬個學額。