政情：沈祖堯引詩詞勉勵畢業生
每年四月都係大學生畢業嘅季節，將喺一八年中卸任中文大學校長嘅沈祖堯，任內經歷學生參與佔領行動等連番風波，佢尋日發表網誌，以三段蘇東坡嘅詩詞勉勵畢業生面對困局要謙卑、兼聽同忍耐，喺紛亂嘅世局下唔好失去信心。
沈祖堯指自己為人師表逾二十年，出任中大校長亦即將七年。由百萬大道千人一齊睇世界盃，到百萬大道嘅麻雀爭議；由校園內各種議題嘅爭論，到社會上嘅政治風波；都令佢留下難以忘懷嘅回憶。
面對學生即將畢業，沈祖堯以蘇東坡嘅《題西林壁》、《定風波》同《念奴嬌•赤壁懷古》勉勵畢業生。其中喺《定風波》嘅一段，佢提到做校長嘅幾年略經風雨，亦教識佢要懂得忍耐，要學會知足。
寄語唔好因前景不濟而灰心
至於喺《念奴嬌》嘅一段，佢指古今風流人物，都係喺亂世之中走出困局，為人群帶來希望同幸福，寄語學生唔好因前景不濟而灰心喪志。佢又透露自己期待卸任嘅日子，但即使卸任都唔會放棄醫療、教學同研究工作。