政情：魔童自嘲傻佬一敗塗地

公司股價似瀑布 蝕咗逾兩億

王維基話兩年前喺港鐵落廣告花費約一千五百萬元，承認呢個決定「完全錯誤」，形容自己「傻佬、好大喜功」，佢話用過往二十年從事長途電話業務同寬頻經驗，「以為自己好叻做廣告」，但同樣想法用喺數碼世界，所以一敗塗地。換言之，佢嗰套唔掂喇！

講到網購生意，佢話尋日十一時至十二時，公司伺服器曾因太多生意，故障半小時「個個月、個個禮拜加server都追唔切、跟唔到個demand」，又指公司股價似瀑布，虧蝕兩億多元，如果大會知道佢公司嘅業績，應該唔會請佢嚟做分享。佢又自爆，顧客喺購物平台嘅一舉一動都會記錄在案，「唔知點解你買同一樣嘢，又會送去兩個唔同地址呀，我哋都會知啦」，而供應商亦可得到相關資料，「佢可以睇下邊啲人係會買三百二十八蚊一包提子o架呢」，公司會儲存客戶資料，以宣傳特價品。