中環出更：英美禁令防恐襲 李文恩話冇得避
早前有報道指有恐怖組織已掌握可以避過常規機場安檢的新型電子設備炸藥技術，英美兩國上月亦因此頒布電子器材禁令，禁止來自部分地區嘅乘客攜帶體積大過手機嘅電子產品上機，早前卓妮喺沙田馬場見到理文化工執行董事李文恩，佢就認為現時科技好先進，電子設備炸藥技術已經唔係啲咩新嘢，好多技術更加新同輕巧，可以話根本防不勝防，冇得避咁話！
李文恩認為機場加強保安措施可以安撫吓大家，等乘客搭飛機嘅時候相對安心啲。佢都有部分客人喺中東嗰邊，可能會覺得唔方便，不過佢自己就飛國內比較多，唔會有太多不便。
太太指原廠線叉電安全啲
不過講起電子產品，唔好話炸彈，早前就連普通市民用嘅電話都接連發生爆炸事件。李文恩太太Lorinda就話，現代人無時無刻都要用電話，夜晚叉電叉通宵好難避免，惟有堅持用原廠線叉電感覺安全啲，而天氣潮濕嘅日子都多加留意睇吓有冇異樣，而如果真係叉過夜就擺喺遠少少嘅地方叉。
轉頭見到香港工業總會青委會主席劉燊濤（Gary），講開禁帶電子產品上機，經常做生意四圍飛嘅佢就話，措施只係應用喺中東同北非國家，所以對佢影響不大。
同場仲有菁英會體育研究會主席潘偉業同太太鄺晶晶，香港中華廠商聯合會青委副主席吳景瀚、工總青委嚴子杰及特許公認會計師公會會長李健。
呢日嚟出席母校校友會盃賽嘅李健透露，大學時屬於讀書派，圖書館就係佢最常打躉嘅地方，而佢雖然近年多咗出席社交場合，但仍謙虛指自己不擅辭令，早前有大學邀請佢講一堂課，講足三個鐘頭嘢，笑言對佢嚟講已經係好大突破喎。
卓妮