政情:網民貼圖惡搞梁麗幗「不再是黃」

違法佔領行動發生至今已經兩年多,近日警方陸續拘捕同起訴包括佔中三子等多名搞手,令因佔領運動而為人熟悉嘅人物亦再次備受關注。曾經喺佔領行動時期同政府高官對話、學聯前常委梁麗幗,日前被網民貼圖惡搞,指佢獲獎學金去美國進修,同埋話佢「不再是黃」。梁麗幗之後喺佢個人facebook(fb)同有關圖片上留言反擊,批評網民幾年嚟全冇長進,連fb換頭像都要改圖先可以去誣陷佢。

其實自佔領行動之後,除咗港大校委會事件,搞咗個罷課委員會之外,梁麗幗已經好少露面。最近梁麗幗更換咗fb頭像,頭像喺佢戴上化妝舞會嘅面具及穿藍色裙及黑色外套,有網民喺fb上載呢幅圖再附上「不再是黃,我已獲批獎學金去美國進修,香港人再見!」嘅字句,更有網民留言批評佢走數。

梁斥改圖誣陷冇長進

梁麗幗隨即喺fb澄清,話自己仲喺港大讀緊書。佢又解釋鍾意藍色「頂天立地、虛空而無窮」,仲話自己鍾意咗成廿幾年嘞!佢又形容,如果有人覺得自己可以為藍色賦予唯一定義,而其他人唔可以鍾意嘅話,「也真是笑話」。至於被批評「走數」,佢就話自己冇打算走數,仲話等緊網民追數添!至於被惡搞,佢批評連佢換幅頭像,亦要改圖先可以去誣陷佢,係「幾年來全冇長進」。

第一手消息請下載on.cc東網iPhone/iPad/Android/Windows Phone Apps