中環出更：何啟明囝囝 好彩避過壞電梯
早前朗豪坊發生壞電梯意外，一條高約廿米嘅電梯發生故障，突然高速打倒褪，嚇親唔少人。立法會議員何啟明家住油尖旺，仲話事發當日都喺附近，而其區議會選區附近都有電梯冒煙，直言自己黑仔。
外母去旅行 無去朗豪坊
何啟明話經常去朗豪坊行街，而且每次都會用到長電梯，因為商場嘅升降機有排等，而佢不足一歲嘅囝囝就更加係常客，外母照顧佢時，每日都會帶囝囝去朗豪坊搭幾次長電梯，因為囝囝可以由高處四圍望，而且天花有唔同燈光夠晒吸引喎！不過，咁啱外母嗰幾日去咗旅行，囝囝當日先可以避開冇去朗豪坊咋！
雖然今次意外嚇親唔少人，但何啟明話都唔怕再去朗豪坊用長電梯，因為機電署已初步證實事故罕見，認為未必再有同類事件發生。佢亦都透露，電梯行業維修工人普遍人工偏低而難以吸引新人入行，最終導致人手緊張而影響服務，直言行業出現老化情況。照咁講今次事故成因都並非單一因素喎。
卓妮