特首選舉結束咗一個禮拜，以七百七十七票當選嘅林鄭月娥，隨即被網民起咗個花名叫「777」，但佢喺一個電視節目中回應被人改花名時，佢就話喜歡人哋叫佢林太或Carrie喎。睇嚟佢都係唔鍾意畀人叫佢做「777」。
喺尋日播出嘅電視節目，席間主持人話特首通常會畀人改花名，問林鄭鍾意被稱為「林特」、「林鄭特」定係「林太」，而林鄭就話喜歡被叫林太，或者英文名都幾好，又話以前做社會福利署署長嘅時候，啲同事都叫佢林太或署長。對於如何修補社會撕裂，佢就話首要改善行政、立法關係。
至於盛傳會出任行政會議召集人嘅陳智思，尋日喺電台節目中就特別提到召集人嘅角色其實冇乜特別，只係會代表行會出席活動或發言，功能上亦冇乜分別，所以根本就唔需要有召集人。雖然佢一早表明做完今屆就會離開行會，但尋日又突然改口，話自己本身係行會成員，相信要做召集人都應付得來。佢又話早就同林太講過，唔會做政府全職崗位，即係唔會做局長嘞！
對於問責團隊埋班好難，陳智思話現時冇制度鼓勵賢能服務社會，搞到哀求人入火海做問責官員，咁嘅方法根本搵唔到好嘅人做局長，希望建立副局長升職嘅階梯，避免全部官員都係空降入嚟咁話喎。