政情：游蕙禎旗袍Look網民圍插
青年新政游蕙禎因宣誓辱華而被法庭取消立法會議員資格之後，久未露面。近日網上流傳一張游蕙禎同友人一同拍攝嘅旗袍照，隨即就引起網民激烈討論，更有人大鬧游蕙禎一方面支持港獨、話要擺脫華夏文化，但又身穿旗袍拍照，係自相矛盾，游蕙禎接受查詢時就解釋，旗袍係香港舊有服飾，叫大家唔好太敏感。
話擺脫華夏文化 自相矛盾
尋日有網民貼出一張游蕙禎同友人一同拍攝嘅旗袍照，身穿黃白色旗袍嘅游蕙禎如同模特兒擺出姿勢，而游蕙禎招牌嘅啡金色頭髮亦染成黑色。有網民就留言問游蕙禎係唔係轉行做模特兒；亦有人質疑游蕙禎話要擺脫華夏文化，但又身穿旗袍拍照有矛盾；更加有人對佢嘅身材大肆批評。
游蕙禎接受查詢時就話，相片係近日同友人一齊影，影完朋友就Post咗上facebook，都唔介意畀大家見到；佢又話唔係改玩中國風，旗袍係舊香港服飾，叫大家唔好太敏感。其實游蕙禎都唔係第一次因衣着問題而惹起爭議，好似佢早前喺農曆新年就曾以一身華服現身，自嘲係「油雞」同市民拜年。睇嚟游蕙禎每隔一段時間就會有唔同Cosplay（角色扮演）裝扮示人，下次佢係乜嘢Look？大家拭目以待喇！