立法會大會尋日復會，原本辯論由立法會議員郭家麒提出嘅「促請下任行政長官重啟政改」無法律約束力議員議案，點知郭家麒自己竟然遲到，另一名議員林卓廷為咗拖延時間等郭家麒就位，於是提出響鐘十五分鐘點算會議法定人數，最終搞到法定人數不足而流會。郭家麒事後解釋，聲稱自己為議案準備咗大量資料，又話前一晚一直難以入睡，扎醒咗四、五次，所以遲咗起身，咁啱又遇上塞車，搞到遲到。郭家麒遲到仲咁多藉口，認真小學雞喇！
