特首選舉結束當日，社民連梁國雄（長毛）隨即主動為自己之前宣布參選錯判形勢而道歉，希望泛民可以抹去過去嘅分歧，一同參與嚟緊嘅周日要求林鄭月娥下台嘅示威遊行。但長毛嘅想法似乎只係一廂情願，事關負責民主派遊行示威嘅民陣已告知民主派，因民氣不足擱置遊行集會行動；而其他民主派亦表明無意參加遊行，睇嚟泛民都係難以團結o架喇！
民主派選委喺特首選舉提名同投票策略上意見紛紜，更出現互相攻擊嘅情況，長毛喺投票後主動示好，並促請泛民參與周日嘅示威遊行，但民主派對社民連要求以「林鄭下台」同「反林鄭」為口號唔多支持，而民陣因協調唔到各方面意見，而且民氣不足決定唔搞。
由區諾軒做召集人嘅民陣尋日發訊息畀成員團體，話徵詢過唔同朋友，認為要求「林鄭下台」，甚至「反對中共干預」，未必能爭取市民上街支持；若將主題轉為聲援九個被控嘅佔中搞手，時機又未必合適，決定將遊行集會等行動暫時擱置。
民陣又話知道有團體非常希望喺下周日遊行，希望佢哋自行舉辦。至於其他主流民主派，都話未必參加。
據了解，即使民主派唔派人參與，社民連仍然會喺下周日，或最遲四月九日舉行遊行集會，以顯示對林鄭嘅不滿。當年特首梁振英當選特首，民主派團結反梁，選舉後嘅首個周日已有萬人上街，時至今日遊行都無人撐場，施壓效果大減，睇嚟都係難以倚仗佢哋日後同政府抗衡。