政情：落水補選 袁海文要問准老婆
因青年新政游蕙禎同梁頌恆被取消立法會資格，九龍西同新界東將要補選，不論建制或泛民都對議席虎視眈眈。多個泛民政黨仲打算喺選舉前搞初選，而民主黨（白鴿黨）方面，喺上年選舉中排黨友黃碧雲第二、依家係深水埗區議員嘅袁海文，開始計劃密密落區見街坊，唔通係為補選備戰？
大讚愛妻體諒
袁海文啱啱搞完白鴿黨黨慶，依家又打算落水玩補選，到時就更加忙，冇乜時間陪老婆。不過結咗婚半年嘅佢就冇有怕，大讚老婆好體諒佢。原來佢計劃參與補選前，第一個就係先問准老婆，成功爭取到批文之後，仲會提早同老婆講定自己嘅時間表，等老婆唔使擔心。
佢老婆之前仲向佢提過，話見過有啲密謀參選嘅人士，係低頭望地、又或者係撳住電話嚟派傳單，冇同市民有眼神交流，覺得呢種態度好唔積極，而且佢老婆嘅家人亦都投開白鴿黨，咁會唔會構成雙重壓力？佢就覺得係種警惕，提醒佢落區時態度要積極啲，唔好敷衍了事喎。