政情：葉建源甩轆 點跨黨合作？
小三「全港性系統評估」（TSA）鬧到滿城風雨，政府早前更提出推行TSA改良版嘅「基本能力評估研究計劃（BCA）」借屍還魂，激起立法會內跨黨派聯署，意圖迫使政府擱置五月推行嘅BCA。負責牽頭嘅立法會教育界議員葉建源前日宣布三十三名議員參與聯署，但竟然有三名建制派議員「被消失」，搞到佢要急急補鑊。立法會逾半數議員聯署，對政府固然有逼力，但係葉建源竟然做到甩甩漏漏，都唔知會唔會影響下次合作添呀！
葉稱自己疏忽 一力承擔
葉建源前日聯同十幾個議員一齊開記者會，喺記者會上話有三十三名議員聯署，事隔大約十個鐘，佢就喺傳媒群組發出訊息，話自己疏忽漏咗謝偉俊，仲向佢致歉添！點知再隔多約十一個鐘，佢就透過助理向傳媒發訊息，原來遺漏名單仲有潘兆平同吳永嘉，埋單計數係有三十六名議員聯署，即係立法會有逾半議員參加。不過搞到甩晒轆，佢就話鄭重道歉，亦都一力承擔責任，話係自己疏忽。
老實講，今屆立法會一開波已經亂局連場，建制派同泛民已經喺選舉事務委員會正副主席互不相讓，自決派仲講到明唔會同建制派合作，今次因為BCA竟然可以企埋一齊實屬罕見，若果因為三個建制派議員無喇喇「被消失」而節外生枝，甚至又引發矛盾，咁就得不償失喇！
喺跨黨派合作下，葉建源尋日喺電台節目中話，特首梁振英（CY）應該釋出善意，回應市民一個完全冇任何政治立場嘅訴求，仲話希望可以透過溝通解決問題，唔想有對立方式出現；有份聯署嘅新民黨田北辰批評CY決斷拒絕係想顯示其威信，認為對方唔使咁強硬，應該同候任行政長官林鄭月娥先商討吓。
吳得掂語氣強硬唔讓步
面對逾半數議員聯署要求擱置BCA，甚至有部分議員講到明，如果政府繼續一意孤行，就會發動罷考。教育局局長吳克儉（吳得掂）尋日重申，BCA只針對學與教嘅改善，唔針對同學嘅個人成績，唔會對學校同學生構成壓力，佢希望教育回歸教育，專業教育唔應該因為政治變化而開倒車。聽吳得掂嘅口氣，睇嚟仲係唔肯讓步，仍然係要硬推BCA喎。