中環出更：特首夢碎 葉劉拎番安慰獎
新民黨主席葉劉淑儀（葉劉）早前喺特首選舉提名階段四出拉票，甚至頻頻發暗箭攻擊對手，但最後都無法入閘，其後因恨做特首恨到出晒面而遭網民恥笑佢係「葡萄乘淑儀」。唔知係咪葉劉心繫祖國都得唔到中央祝福，市民對佢產生憐憫之心，葉劉喺最新嘅立法會議員評分中爆升，成為港島選區中評分最高嘅議員，連帶佢嘅黨友田北辰嘅評分都齊齊升，可以話係最佳嘅安慰獎。
港島區最高評分議員
香港研究協會喺本月二十至二十九日以電話訪問咗約一千名市民，了解佢哋對各直選議員嘅評分，以五分為滿分，葉劉嘅得分為三點零二分，較上次調查上升咗零點二三分，成為港島選區中評分最高嘅議員。
至於佢嘅黨友田北辰，評分亦較上次上升咗零點二八分至二點九二分，喺新界西選區中得分僅次於朱凱廸；另一黨友容海恩嘅評分亦有輕微提升，但仍然喺新界東選區包尾，真係要加把勁嘞！
呢次民調顯示，新民黨三名議員嘅評分都齊齊上升，葉劉可算係塞翁失馬，焉知非福，相信佢亦唔需要再「葡萄」其他人喇！
卓妮