中環出更：名媛旗袍展美態蔡關穎琴：着唔慣
香港工商界婦女慶祝國際婦女節聯歡晚會早前舉行，當晚衣着主題係旗袍，唔止台上有多場精彩表演，一眾名媛亦着上旗袍爭妍鬥艷。穿旗袍可令女士舉止斯文優雅，但中華總商會（中總）會長蔡冠深嘅太太蔡關穎琴（Janice）就笑笑口自爆，讀書時校服係旗袍，無奈佢成日鍾意跑，搞到開衩位經常爛喎。
Janice平時着西服多過華服，佢話唔係因為作風洋化，而係着唔慣。着旗袍時要動作慢啲，但係佢太性急，所以除非焗住要着旗袍，否則可免則免。
李嘉音屋企有幾百件旗袍
中華廠商聯合會常董李嘉音啱啱相反，佢嘅旗袍形象深入民心。嘉音姐笑笑口話已着咗三十幾年，覺得旗袍好靚，一着上身即自然流露中國女性嘅韻味。佢一路幫襯台灣一位旗袍大師，屋企有幾百件旗袍，仲話第日呢位大師想開旗袍博物館或展覽，佢一定拎幾件私人珍藏出來展示添！
同場仲有中總婦委榮譽主席黃周娟娟、中華出入口商會婦女委員會主席楊靜（Sally）同副主席陳余小春等人。
Sally笑稱自己啱啱出任婦委主席，預咗經常要着旗袍出席活動，所以最近去本地知名設計師店舖一口氣買咗七件，當日即刻着番出嚟，陳余小春都讚件衫好靚。
來自台灣嘅中華旗袍文化推廣協會前理事長石淑平同女兒薛幼妮都有到場，卓妮見佢哋都識廣東話，原來以前屋企保母係廣東人，加上囡囡喺香港定居多年，難怪溝通冇難度喇！
卓妮