政情：尹兆堅換眼鏡 街坊唔認得
新一屆立法會有唔少議員新丁，要市民記得自己都唔係咁容易。民主黨（白鴿黨）尹兆堅尋日就換咗新眼鏡，以新形象示人，但佢就大嘆只係換咗副眼鏡，已經有街坊話唔認得自己嘞！咁咪捉蟲囉！
話唔少人覺得新形象好睇
尹兆堅話，為咗建立斯文嘅形象，七、八年前開始已經用幼鏡框嘅金絲眼鏡，近日想換換新形象，就改用咗另一副黑色膠框眼鏡。佢話唔少人都覺得新形象好睇，更有人覺得佢睇落高咗，但亦有街坊因而唔認得佢，喺街上問佢：「你係唔係尹生呀」？
因為今次事件，尹兆堅話換副眼鏡就發現形象對從政者非常重要，仲話如果街坊真係唔認得，可以隨時換番之前嗰副金絲眼鏡喎。佢又話自己仲收埋咗好多時髦嘅眼鏡，有好多係名牌添，不過太潮又擔心街坊都係接受唔到，所以都難以派上用場喇！