政情：謝志偉吳清輝齊撐鄭恩基澳門攞博士
澳門科技大學日前頒授榮譽工商管理博士學位畀浸會大學校董會主席鄭恩基，以表揚佢喺推動高等教育同社會發展嘅貢獻。喺頒授學位當日，除咗鄭恩基嘅父親、前行政及立法兩局議員鄭漢鈞撐場之外，仲有個驚喜喎，就係浸大兩位前校長謝志偉同吳清輝都有親身到賀，除咗畀面之外，佢哋肯定有交流浸大嘅發展喇！
鄭恩基就話對於今次獲頒榮譽博士學位覺得好榮幸，未來會繼續服務社會同高等教育界，繼續帶領發展。
父為工程界老行尊鄭漢鈞
翻查資料，鄭恩基同佢父親鄭漢鈞都喺本港工程界好出名，鄭漢鈞係行內老行尊，除咗做過行政及立法兩局議員，亦曾擔任過香港房屋委員會主席。鄭恩基亦繼承父業，既係專業土木及註冊結構工程師，更係英國結構工程師學會一百一十九年以來，唯一一位非英裔會長。今次佢再獲頒榮譽博士學位，可以話係錦上添花。