中環出更：微博借足球貶中韓 游蕙禎證造假
青年新政嘅游蕙禎因宣誓辱華風波而被法庭取消立法會議員資格，日前有報道披露一個名為「游蕙禎＿HK」嘅帳號，喺世界盃亞洲區外圍賽上演中韓大戰當日發布微博貼文，指「我知足球是一項『低等』民族的淘汰賽，所以今晚誰輸誰贏一目了然」，報道又質疑佢之前撐香港隊，香港隊都變成低等民族。游蕙禎尋日隨即喺社交媒體facebook（fb）直指呢個係假帳號。
發言遭截圖 急急澄清
一場薩德風波導致中韓關係緊張，世界盃亞洲區外圍賽第三圈賽事，上周四於內地長沙上演中韓大戰，引起全球關注。游蕙禎尋日喺fb張貼一幅截圖，顯示一個fb專頁引述有關假帳號嘅貼文指，「雖然作為一個女仔對足球不感興趣，但是我知足球是一項『低等』民族的淘汰賽，所以今晚誰輸誰贏一目了然。」
該專頁更喺截圖寫上「依（咦）……你之前好撐香港隊o架喎？香港隊都變咗低等民族！」明顯係質疑佢貶低民族同足球賽事。游蕙禎尋日喺fb貼文澄清自己早就講過唔用微博，又反問「假Account（帳號）當真野（嘢）報道係咩玩法？」
其實，出現游蕙禎嘅假微博已有前科，早喺二月初亦有同一個微博帳號貼文，先係希望大家多關照，隨後更叫大家「早抖」。
卓妮