中環出更：名人論的士做得好唔怕競爭
政府打算推出「專營的士」試驗計劃，新增六百輛提供更「優質」服務嘅的士，引起業界極大回響及不滿。卓妮尋日喺沙田馬場見到一班城中名人，佢哋認為香港其實都有好多好嘅司機，不過亦有改善空間。東華三院副主席王賢誌就覺得除咗司機態度外，車廂舒適同整潔度都好重要。
王賢誌話有時太早開工或者同朋友食飯食到好夜都會搭的士，講開有冇遇過「劏客」嘅司機，佢就笑言自己係個「好乘客」，一上車會主動話要行西隧，事關近佢屋企又夠快。佢話香港好多司機好友善，但間中總有啲唔好嘅，好似早幾日有報道話有司機因拒載趁掟彎時將乘客拋咗出車外，真係聽到都嚇親，而中環等地亦不時有司機拒載或揀客。佢認為香港的士嘅競爭好大，又舉例話Uber啲車舒服啲，司機態度又好，所以的士想多啲生意都要努力改善喇！
鄭錦鐘倡向新加坡取經
道路安全宣傳運動委員會主席鄭錦鐘同太太亦有入場，鄭錦鐘話優質的士可以倣效新加坡的士嘅做法，打電話Call完再去鄰近嘅站度等，咁就算一個女仔夜晚搭的士都會放心啲，但如果好似平時咁樣喺條街度截嘅就冇乜意思喇！鄭太就話間中都會遇到截唔到的士嘅情況，又話如果有得揀都唔介意畀多少少錢。
信興集團主席兼行政總裁蒙德揚就試過喺泰國搭的士，本來十五分鐘就到嘅路程搭咗二十分鐘都未到，見唔多對路就同朋友決定落車，至於香港的士佢就認為有競爭先有進步，佢試過上車後司機話唔識路，車咗佢去過海的士站就放低佢，雖然佢冇乜所謂，但如果的士司機本身服務好啲，就唔怕競爭喇！
卓妮