中環出更：如魚得水鄭李華熙興趣成職業
將興趣變成職業係最幸福嘅事。仁濟醫院總理鄭李華熙（Winnie）旗下上市公司早前舉行春茗，數百政商名流齊去湊熱鬧。Winnie嘅公司業務經營金融、免稅店同運動零售產品等，其中包括某國際名牌泳衣。同場嘅仁濟總理孫蔡吐媚就踢爆，Winnie游水好叻，係如假包換嘅女飛魚。唔通因為咁，所以Winnie做埋泳衣生意？
Winnie就笑笑口話，小時候佢係福建省嘅游泳省隊，移居香港之後，有一次喺維多利亞公園游水時被發掘，其後參加好多比賽、攞咗好多獎項。至於做泳衣生意純屬無心插柳，唔係刻意去追尋。依家佢公私兩忙，已經甚少游水嘞！
思捷環球主席柯清輝、港鐵主席馬時亨同仁濟前主席嚴玉麟都有到場，Winnie嘅老公鄭盾尼就忙於招呼賓客。講開游水，馬時亨笑稱唔識，仲自爆一段古。話說佢細個時，有一次細佬游水差啲出事，佢哋就被媽媽下禁令唔准玩水。後來大個咗試過習泳，但仍然唔識。聽佢語氣好似有啲失落，其實第日同外孫女一齊學咪得囉！佢聽罷精神為之一振，笑稱係個好提議喎！
柯清輝夫婦喜弄孫
卓妮見柯清輝同太太黃麗寧成晚湊住一名小豆丁，細問先知係寶貝孫仔。柯太話佢哋有四個仔，當晚大仔柯百利及二仔柯百達都有到場，至於三仔及細仔就喺菲律賓打理商場及地產業務。睇嚟身為菲律賓華僑嘅柯太，對菲國真係好有感情喎！
卓妮