華永化寶不便玩殘孝子

「一家大細由靈灰閣行落去戶外化寶區，需要十分鐘，真係好唔方便。」日前在將軍澳華人永遠墳場掃墓的李女士直指，由於家中長者體力欠佳，難以來回戶外化寶區與墓地的一段「奪命長斜」，只能坐在靈灰閣呆等，由兒孫代為拜祭先人。

「奪命長斜」並非將軍澳華人永遠墳場獨有。在荃灣華人永遠墳場拜祭的孝子，要化寶時亦要走上長長斜路，到達指定化寶區。記者由荃灣第二靈灰閣作為起點，測試到化寶區的時間，即使快步走，也要近五分鐘腳程。

至於柴灣華人永遠墳場及香港仔華人永遠墳場，雖然戶外化寶區設於距離靈灰閣較近位置，但上落問題，同樣考起一眾孝子賢孫。「我十幾年嚟喺柴灣呢邊，都係拜祭完先人龕位後，喺同層設置嘅化寶爐，即場化寶，依家要行樓梯落樓下燒衣，真係好唔方便。」周先生擔心，柴灣靈灰閣只有一部細升降機，供行動不便長者使用，到清明拜祭高峰時會大排長龍。而樓高五層的香港仔第二靈灰閣，更不設升降機，孝子只能依靠樓梯上落去化寶。

靈灰閣禁燃蠟燭及大香

戶外化寶區位置惹人詬病，更重要的是，在該安排下，於拜祭的繁忙時段，化寶須由華永職員代勞。李女士直指做法荒謬，又批評將一眾孝子的祭品「擺埋一齊燒」，做法失當，「如果係咁，倒不如喺屋企燒？中國人傳統係要自己燒自己嗰啲衣紙，燒衣都假手於人，毫無誠意！」

另外，對於靈灰閣禁止燃點蠟燭及大香的規定，另一孝子劉先生指規定不近人情，「始終中國人傳統社會，拜山都係想點蠟燭，向先人表達敬意，咁多年嚟都無事，唔明點解要禁止。」

玄學家周漢明稱，燒衣是中國人的傳統習俗，由親人自己燒衣，先人最易接觸到，也是表達孝心的方式，「其他人代燒，感覺隔一重。孝子惟有喺衣包、祭品上，寫清楚先人嘅名、邊個敬上，至可能確保先人收到。」

管委會：將重開部分化寶爐

華人永遠墳場管理委員會表示，在一六年重陽節，實行停用轄下靈灰閣內的化寶爐期間，於靈灰閣外或戶外地點設立的化寶設施，經檢討後，決定在一七年清明節，重開靈灰閣部分已完成維修的化寶爐。而基於安全，掃墓人士不可以在靈灰閣內點燃大香及蠟燭，但可於點香區燃點線香拜祭先人。

文：劉凱欣

圖：朱偉坤