特首選舉進入大直路，林鄭月娥、曾俊華、胡國興誰勝誰負，很快就會揭盅。林鄭既是盛傳嘅大熱，「黑材料」自然也會跟着熱氣膨脹上升，當然，林鄭冇乜「艷史」可爆，頂多係唱吓佢有「情書第二波」，或會由「林先生」、「老公」去到「打令」，這也不過是「倒啃甘蔗」，一段婚姻因特首選舉而「漸入佳境」，誠可喜可賀也。
所謂「倒啃甘蔗」，指從甘蔗的尾啃起，直啃到蔗頭會甜啲喎，老朽未試過，東晉大畫家顧愷之就試過，有實踐就有發言權，佢話每吃甘蔗必從尾到頭，並指這種吃法叫「漸入佳境」。林鄭是否已「漸入佳境」，老朽不知道，之但係同文提醒佢切勿以為自己真係「好打得」就目空一切，連門面嘢也懶得做，咁就可能會陰溝裏翻船。
其中兩點直情係袋錢落佢袋，第一點係提醒佢唔好忽視基層團體。依家不過係落區天水圍了解吓基層有乜訴求啫，你竟然話「呢兩日比較攰，唔想去天水圍咁遠」。你出入有專車，不必轉搭公共交通工具，咁都話攰？如果真係有心解決基層問題，更應該風雨兼程，帶埋蛋撻、蝦餃去，盡顯親民誠意。夠硬淨、好打得，萬家燈火都在開飯而政府大樓有你一盞孤燈，仍在默默地批示公文──係唔會令你民望上升o架，只有真正「從群眾中來，到群眾中去」，才能夠得民心。
第二點係提醒林鄭自爆丈夫和兒子依然擁有英籍，但她卻輕描淡寫以「多個旅遊證件」蒙混過關，而入籍一個國家通常都要宣誓效忠，丈夫係英籍，林鄭他朝入籍亦不難，這跟中央定義的「裸官」並無二致。共產黨最愛講「忠誠」，林鄭顯然茅塞未開。所謂「藥醫不死病，死病無藥醫」，係形容那些頭腦如花崗岩的人，怎樣做思想工作也做不通。冀林鄭解開迷思，叫「打令」勿戀棧從前的「日不落國」，風景這邊獨好也。